♠ Posted by addphl at 1:32 AM
Sa
wala pa matukod ang among gamay nga kapilya diri sa among dapit sa Sitio Patag,
nagsugod nami ug saulog sa pulong sa Dios, pinaagi sa awhag sa among padre kura
nga na-assign diri sa parokya sa Malapatan. Si Fr. Ariel Destora, nagsaulog mi
sa matag domingo pinaagi sa kaabag sa S.I.L Sapu Padidu, niadtong bulan sa
Oktobre 2013. Dayon nagmisa si Padre sa matag bulan sa amoa diri ug nalipay kaayo
mi. Iya gayud adtu-an ang mga suok-suok nga
dapit aron makabig ang uban nga kristiyanos nga katoliko nga nalimot sa pagduol sa Dios.
Sa
bulan sa Disyembre 2013, naghatag siya ug libre nga bunyag sa mga kabataan ug
sa mga dagko, nga wala pa mabunyagi ug tungod niini nalipay kaayo ang mga ginikanan. Sa pag-abot
sa bulan sa Enero petsa 8 tuig 2014, nagsabot mi nga magtukod ug kapilya, kay aduna
may luna nga yuta nga patukuran. Si Gaga Sentasas maoy among gihimo nga
presidente sa among kapunungan. Nagpasalamat mi ni Gaga ug sa iyang asawa sa
ilang paghatag sa maong luna. Apan, wala pa hinooy Deed of Donation. Sa wala madugay naporma ang maong kapilya sa tabang usab ni padre kay mihatag man siya ug
kahoy ug sin. Duna usab nga mga kaabag nga taga Lun Padidu, taga Poblacion sa
Malapatan nga gipaari ni Padre aron tabangan kami sa paghimo sa among kapilya isip
bayanihan ug uban namong mga miyembro.
Nagpasalamat
usab kami ni Mr.and Mrs. Taratara kay ang ilang truck maoy nagkarga sa kahoy ug
sin, gikan sa parokya sa Malapatan. Gipasalamatan usab namo si John Lord (Jun2x)
Peñaranda kay gipagamit mi niya sa iyang battery ug karaoke ug suga aron kami mahayagan sa
panahon nga adunay gimbuhaton sa kapilya nga magabhian na. Sa bulan sa Abril
petsa 17-18 tuig 2014 among gisaulog ang pagpanghugas sa mga tiil diri sa among
kapilya. Ug sa pag-abot sa bulan sa Disyembre pitsa 28 tuig 2014 sadya kayo
kami kay fiesta na man namo, nianang adlawa atol nga Pasko ng Pamilya usab,
nagtampo-tampo lang kami ug mga pagkaon nga among ikadalit sa among mga bisita
ug kang Father Ariel. Gitingob lang namo ang among gihimong kalingawan sa Pasko
sa pagkatawo sa atong Ginoo ug sa among kapistahan.
Human
sa paniudto nagsugod dayon mi ug padula-dula sa mga bata, parlor games, Singing
Contest, Carolling Contest, dunay pagkatkat sa kawayan nga dunay kwarta sa
ibabaw nga gibutangan ug oil. Adunay nakadawat ug mga premyo nangalipay kaayo
sila. Kay duna kuno sila’y handumanan sa maong fiesta. Ang Sagrada De Familia
ang among gihimo nga patron diri sa KK Patag, mahitungod kay ang tag-iya niini
nga mao sila si Mr. and Mrs. Gaga Sentasas, gipadamgo man, kay kining maong
santos gilabay na man unta sa tag-iya nga mibalhin na sa laing sekta nga mao
ang Pentecostal nga uyuan ni Gaga, mao nga ilang gikuha kay gipadamgo man sila
nga magkuha ang maong santos. Mao nga kaming mga miyembro, miuyon na lang usab
nga maoy buhaton nga patron sa kapistahan. Kay basin ka makuhaan ug
panig-ingnan o sumbanan sa matag usa pamilya ang kaayo, kalomo, ug
kamasinugtanon sa maong patron. Jesus, Maria ug Jose.
